20140522_537e7f984525c.jpg
حمام محشي بالأرز والكبدة

المكونات

زوج حمام

 

كوب أزر مصري مغسول ومصفى

 

بصلة كبيرة مقطعة قطع صغيرة جدا

 

ملـعـقـة صغيرة بهارات

 

2 معلقة كبيرة زبدة

 

عصير 3 ليمونات

 

2 فص حبهان

 

ورقة لاورا

 

ملح وفلفل

 

كوب دقيق

طـريقة التـحـضـيـر

1- اغسلي الحمام كويس مـن جوه ومـن بره بالميه، وانقعيه لمدة ساعة في الدقيق وعصير الليمون.

2- بعد كده اشطفيه كويس جدا بالميه، واعملي فراغ بين الجلد واللحم بحرص شديد بحيث إن الجلد ما يتقطعش مـنك.

3- تبلي الحمام بالملح والفلفل مـن جوه وبره وبين الجلد واللحم ومـنطقة الرقبة، وسيـبيه لمدة نصف ساعة علشان يتبل كويس.

4- في الـوقت اللي الحمام هيتبل فيه، ابدئي في تجهيز حشو الحمام؛ بإنك تقطعي كبدة الحمام قطع صغيرة جدا، وتخلطيها مع البصلة وتضيفي عليهم البهارات والملح والفلفل وملـعـقـة الزبدة وقلبيهم كلهم مع بعض كويس.

5- شوحي خليط الكبدة والبصل على النار لمدة 10 دقايق مع التقليـب المستمر، وبعد كده ضيفي عليه الرز، وقلبيهم كلهم مع بعض لمدة 10 دقايق كمان، وبعد كده ضيفي عليهم الميه، وسيـبيهم على النار لغاية ما الميه تغلي، وبعد كده هدي النار، وسيـبيه لمدة ربع ساعة علشان الرز يتشرب ويستوي.

6- ابدئي في حشو الحمام بخليط الرز، وخدي بالك إنك تحشي قلب الحمام، وبين الجلد واللحم ومـنطقة الرقبة.

7- اسلقي الحمام بعد ما تحشيه في ميه مغلية مضافا إليها ورق اللاورا والحبهان والملح والفلفل وبهارات اللحمة.

8- سيـبي الحمام على النار لمدة 20 دقيقة أو لغاية ما تلاقيه استوى، وبعد كده شيليه وحطيه في مصفاة ورشي عليه شوية فلفل أسود.

9- حمري الحمام في الزبدة والزيت، وبعد كده ارفعيه على مـناديل ورقية علشان تتشرب الزيت، وبعدين حطيه في طبق التقديم.

اقرأ ايضا: