صحن-شاورما-بطحينه.jpg
قلت لازم انزل هالوصفه قبل لا انزل سفره الفطور ( لاني ما اصور كل يوم ) … هالوصفه صراحه وايد عجبتني .. سويتها امس على الفطور كتجربه بس يازلتي وصارت وصفه معتمده
اخذت مقدار التتبيله من ام ناصر om naser_64 عسى الله يطول بعمرها ( اتوقع الحين تدرون شكثر احبها واحب وصفاتها ) ولعبت فيها شوي وحطيت بويهها طحينه
اللحم المستخدم اهو نفسه البفتيك .. كانت حاطه دهنه او ليه  على ويه الشاورما بس انا ما حبيت هالاضافه واستبدلته بزيت الزيتون
انا بذكر مقداري اللي اهو هالصحن اللي تشوفونه قبالكم + صحن صغيرون حق الخدم
صلصه الطحينه سووها حسب اللي تحبونه انا خلطت روب وهرده وعصير ليمون وملح وماي على النظر بس سويتها خفيفه عشان تتغلغل باللحم
المقادير:
ربع كيلو لي 300 غ لحم بفتيك مقطع شرايح
نص قفشه كبيره ملح
قفشه كبيره بهار الشاورما ( اخذته من مطحنه الرفاعي بجيان .. ينن اخذوه وانتو مغمضين حق شاوما اللحم والدياي والحمسات السريعه )
قفشه كبيره خل
قفشتين كبار زيت زيتون
رشه مسمار ناعم
رشه فلفل اسود
بصله مقطعه مكعبات
نص طماطه شرايح
ربع فلفل اخضر شرايح
صلصه طحينه
الطريقة:
نخلط اللحم مع الملح والبهار والفلفل الاسود والمسمار والبصل والخل والزيت ونفركهم بيدنا عشان نتاكد انهم تمازجو ونخليهم يتبلون فتره ( انا خليتهم ساعه تقريبا )
يا اما ندخله الفرن ثلث ساعه لين يتحمر الويه ونحمسه لين ينشف ماي الصلصه مع الطماط والفلفل
او على طول نحطه بالمقلاه مع الخضار ونخليهم لين ينشف الماي ويستوي اللحم
وعند التقديم نحط صلصه الطحينه بالويه وتقدرون ترشونها ببقدونس مفروم
وبالف عافيه

اقرأ ايضا: