اسهل-تشيزكيك-بالفرن8230..jpg
وايد هين هالتشيز كيك ما يبيله عباله ومكوناته شويه واغلبها جاهز واسهل شي انه ما يبيله مجابل … فشوشه بعد جبدي قايلتلها اني بنزل وصفه حلو من زمان … اتمنى هالوصفه تعجبج  بالاضافه ان ابوي فديت عمره موصيني اسوي له تشيز كيك من فتره
الوصفه مو لي ماخذتها من عالم حواء من عضوه اسمها كريكره  انا بس عدلت شوي المكونات … كنت اسويها من زمااان على هيئه ميني تشيزكيك
عاد مره من المرات وانا احوس بمركز سلطان جان اشوف قوالب قصدير فيه الكرست جاهز اخذته لان كان ودي اجرب الغراهام وبشوف الفرق بينه وبين الدايجستف لاني اسمع وايد عنه
تقدرون تضيفون اي نوع صلصه تحبونها سواء توت ولا فراوله ولا كرز … نص علبه عاده كفايه بس لان عيني ضيجه حطيت العلبه كلها ههههه
الافضل المقادير تكون بحراره الغرفه عشان تسهل عليكم الخلط
بسم الله …حياكم
المقادير:
علبتين ونص جبن فيلادلفيا ( 500 غ )
بيضتين
بشر ليمونه
فانيلا سائله حسب الرغبه
كوب شكر
وعلبه باي فلينغ … باي نكهه تحبونها
علبه كرست جاهز ( اذا مو متوفره استخدمو دايجستف وزبده بالكميه اللي فيها تغطون قالب الشيز كيك وتقدرون تضيفون معاه قشر ليمون او دارسين او جوز الطيب مبشور )
الطريقة:
نشغل الفرن بدرجه حراره 180-190
نخلط الجبن والشكر والفانيلا وقشر الليمون والبيض ونصبه  فوق البسكوت وندخله الفرن ونتركه 60 دقيقه تقريبا او لين يستوي (لما  يصير عليه لون خفيف اصفر )… بتشوفونه ينفش ويفش ترا عادي لان كميه البيض شويه
بعد ما تسكرون النار بطلو باب الفرن وخلوها تبرد وحطو الطبقه العلويه ودخلوها جم ساعه بالثلاجه لين تبرد واكلوها بالف عافيه

اقرأ ايضا: