خلطه-مرق-االسمج-للتفريز.jpg
احب مرقه  السمج  وبهالطريقه بتكون موجوده حزه اللي ابيها… وكل اللي عليكم تضيفون ماي وزياده معجون اذا حبيتو والسمجه  ولومي  عدل…. طبعا اي ضافات ثانيه تقدرون تزيدونها مثل الصبار او فلفل علوب و حتى اذا تحبونها مع باميه
المقادير حسب رغبتكم.. انا عاده اضيف حلبه مجففه بس اذا ما تحبونها الغوها …كميه الكزبره تكون ضعف كميه الشبن بس هالشي يعود حق رغبتكم
انا ذاكره طريقه مرقه السمج بالبلوق ما فيها اختلاف الا باشياء بسيطه عشان لا تمرمر مع التثليج
اهم خطوه انكم تطولون بالكم مع حماس الخضره لانها بتطلع لكم نكهه المرقه وااايد احلى
المقادير:
بصله
شدتين كزبره
شدتين شبنت
نص قفشه حلبه مجففه او قفشتين كبار الخضرا اليابسه المجففه مالت السمج
بهار حسب الرغبه انا احط تقريبا قفشه شاي صغيره مالت الحوس لكل من ( لومي اسود و كزبره و بهار) وقفشه وسط ( بهار السمج او بزار بحريني )
طماطتين بالخلاط مع علبه معجون طماط
وملح او اذا تحبون الغوه وضيفون بحزه الطباخ
زيت بكيمه وفيره … يعني بحدود ربع كوب او اقل بشوي … مادري شنو السبب بالضبط بس لما الدهن يكون راهي ما تسود الخضار وهي بالفريزر
الطريقه:
نضيف الزيت ونحمس فيه البصل لين يقلب لونه ويصير شفاف تقريبا وبعجين نضيف البهارات ونخلطهم ونوطي على النار ونضيف الخضار الطريه ونحمسها لين تنشف ويتغير لونها الى زيتي غامج ( هالعمليه تاخذ ربع لي ثلث ساعه ) وبعدين نضيف باجي المكونات ونخلطهم لين تنشف الطماط ويصير الخليط جنه معجون… نتركها لين تبرد وبعدين نعبيها وندخلها الفريزير لي حزه اللي تطبخون فيها
وبالف عافيه

اقرأ ايضا: